مع اختلاف مجالاتنا واهتماماتنا إلا إنه فى خطوات مشتركة بينا بتحركنا وتاخد بإيدينا اتجاه التطور والوصول للهدف أسرع . _ علشان تحقق اى نجاح فى حياتك مش محتاج غير إنك تكون شخص فعّال .
_ الفعّالية :- هى نتائج مرضية ناتجة عن الأفعال اللى بنقوم بيها فى حياتنا .
* علشان تكون شخص فعّال فانت لازم يكون عندك نموذج ذهنى صحيح عن الأشياء ..
_ يعنى لو انت معتقد ان تحقيق النجاح بييجى بعد كتير من العقبات فانت هتوصل .
_ فى المقابل .. لو انت مؤمن ان تكرار الفشل معناه عدم وجود للنجاح فى حياتك فللأسف مش هتنجح أبداً .
* علشان كدا لازم تكون شخص إيجابى عندك رؤية سليمة لكل شئ .
مش شرط توصل بعد شهر ولا سنة ، الشرط اللى انت أخدته على نفسك هو انك توصل بسلام وبأفضل مكسب ، علشان كدا هنقولك 7 أنواع كبسولات هتساعدك فى تحقيق التطوير والإستفادة . ▫ أهم 7 خطوات لتحقيق الفعالية وأفضل انتاجية :- 1_ كن مُبادراً " Be proactive " :- انك تكون شخص مبادر معناه انك هتبدأ تاخد خطوات مؤثرة فى حياتك ، هتقوم بيها لوحدك بدون مؤثر خارجى ، بإرادتك وشغفك ، وعندك إيمان بنجاحها . * اى عمل هتقوم بيه هيكون بسيط ، ولكنه فعّال ومناسب لامكانياتك .. خطوة بخطوة هتلاقى امكانياتك زادت . * هقولك مثال بسيط عن الشخص المبادر والكسول _ زجاجة الماء وزجاجة البيبسى " الاتنين مليانين للنص بس " ... رُج الاتنين ف نفس الوقت ، هتلاقى ان الماء محصلهاش اى تأثير ، لكن البيبسى حصل فيه فوران . ▫ الماء proactive لانها عارفة ان تأثيرك عليها وهو الرج ملهوش لازمة ، لاقينا عندها ثبات . ▫ البيبسى reactive بمجرد ما أثرت عليه بمؤثر بسيط ادالك ردة فعل ، ردة فعله ملهاش لازمة لكن هو مفهمش من البداية ان تأثيرك عليه ملهوش لازمة . 2_ خلى عندك رؤية واضحة :- قبل ما تبدأ وتاخد خطوة اعرف انت رايح فين وهتمشى ازاى ، ومين هيساعدك . 3_ رتب أولوياتك :- اهتم بالأعمال القليلة اللى هتلاقي منها نتيجة افضل ، متضيعش وقتك ومجهود فى فعل نتيجته مش واضحة وهى دى قاعدة 20/80 " pareto principle " . " نسبة قليلة من الأعمال تؤدى إلى نسبة كبيرة من النتائج " * مصفوفة الاولويات بتقولك ان أهم حاجة لازم تركز عليها هى الامور اللى هتساهم فى تطوير مهاراتك وأفكارك .
4_ المكسب المشترك :- شارك غيرك فى انه يوصل ، واطلب منه يساعدك فى وصولك .
" الحياة مش سباق علشان يكون فيها فائز واحد فى النهاية ! " .
_ خليك عادل ومتستغلش حد .
_ خليك شجاع وذكى ومتخليش حد يستغلك .
* لكن متنساش روح التعاون والمساعدة بقدر الامكانيات المتاحة .
5_ افهم الناس قبل ما تطلب منهم يفهموك :- فهمك للناس بيوفر عليك مجهود كبير فى كل حاجة بتعملها معاهم .
* اختلاف الرأى مطلوب ، ولكن النتيجة المرغوبة هى الإضافة والاتفاق .
* وقت ما هتكون فاهم اللى قدامك دا هيساعدك انك تخرج من اى نقاش وسوء تفاهم بمكسب .
6_ التعاون الإبداعى :- جهاز الكمبيوتر لولا وجود فريق متعاون ، كل عضو بيمتلك ميزة إبداعية تميزه .. مكانش وصل والفكرة نجحت .
* وخلى بالك .. فى اغلب نشاطات الحياة مش هتقدر تقوم بيها لوحدك ، اختار زمايل مناسبين ليك وكل شخص فى مكانه المناسب لمهاراته وخبراته .
" عدم التعاون أفضل من التعاون السئ "
7_ اشحذ المنشار :- متفكرش تقطع جذع الشجرة والمنشار محتاج حِدة لان دا هيستهلك منك مجهود كبير ووقت أطول ، نطبقها على حياتنا وهنقول متكسلش تاخد خطوة ضرورية هتساعدك ، متفكرش ف المجهود .. بص على العائد النهائى .
* متكتفيش بإنك بتعرف تقرأ قرآن .. اتعلم التجويد علشان تسهل على نفسك القراءة .
* متكتفيش بإنك بتشتغل .. مارِس رياضة ، وعوض جسمك بمقدار النوم الكافى ومتقولش النوم هيضيع وقت ! .. لو استمريت يومين شغل هتوقع فى التالت ، لا هتحصل نوم ولا شغل .
كتابة: مروة طنطاوي
تعليقات